بقلم رشيد بوجعبط…علم النفس العكسي الايجابيات والسلبيات

معا من تا يصلاح “علم النفس العكسي” ؟
صراحة تا يصلاح مع ڭاع بنادم لي فيه العكس ، لي متمرد ، لي راسو قاصح ولي نرجسي .. الأطفال، المراهقين، الحب ديالك وحتى الزبناء ديالك .. ممكن مثلاً بنتك مراهقة باغا تحضر لشي حفلة فليل و نتا ما باغيش حيت عارف داك المكان لي غادي تمشي ليه خطير و الرفقة لي غتكون معاهوم ماشي زوينة .. فهاد الحالة غتشرح ليها علاش ما بغيتيهاش تمشي تحضر لديك الحفلة أوو في الأخير تقول ليها: ما نبززش عليك ما تمشيش .. غالبا غادي تفكر مزيان وتراجع على القرار ديالها .. شي مرات تادخل لشي بوتيك د لحوايج باش تْقْدَا شي سروال .. مول لبوتيك تايوريك واحد تلاتة د سراول ولكن واحد زوج سراول غي حداك ما تاوريهومش ليك إِكْسْبري باش مين تقوليه: أوو هادو أعمي شحال؟ .. تايجاوبك هُوَ: هادو زايدين شويا فْ الثمن .. في الآخير تا تصدق داي من هادوك لي زايدين في الثمن غي باش تْتْبت لمول لبويتيك بلي نتا مقود وخا في الحقيقة مول البوتيك مقود عليك ..

بزاف د الأخصائيين و علماء النفس ضد إستعمال علم النفس العكسي حيت فيه مخاطر بزاف .. تقدر تقول للطفل ما تنقصش شعرك و صدق ناقصو و داكشي لي بغيتي نتا منو .. غتقوليه : براڤو أولدي .. دري غا يتخربق ليه دماغو .. وغا يتساءل كيفاش قاليا فالأول ما تنقصش شعرك أوو دابا تايقولي براڤو .. وبالتالي أوتوماتيكومو غيتعلم ما يبقاش اسمع لهدرتك حيت نتا غي هبيل متناقض غير مع راسو ..

* أما إلى غرك الشيطان و قولتي للحب ديالك : صافي نتفارقو هاد العلاقة ما بقاتش عاجباني .. ونتا تاتسنا منها تقوليك داكشي ديال الدراما د تواركا : لا يا كمال لا تتركني من فضلك لا أستيطيع العيش من دونك .. وتصدق تقوليك: را كونت باغيا نقول ليك من شحال هادي نساليو هاد لاغولاسيو .. تما ما تلومش علم النفس العكسي ولكن لوم راسك أراس تيمومة حيت ديجا قوتليك ما تقراش هاد المنشور و شديتي معايا العكس و قريتيه